हरणतळयाचा कात्रज तलावा सारखा विकास करणार –
भाजप-आरपीआय महायुतीच्या उमेदवारांचा निर्धार
प्रभाग क्रमांक ३ (विमाननगर – लोहगाव – वाघोली)
लोहगाव टाईम्स : प्रतिनिधी
लोहगाव मधील हरणतळे विकसित करून पर्यटन केंद्र करणार आहे. या हरणतळ्याचा पुणे महानगरपालिकेच्या मार्फत कात्रज तलावासारखा विकास करणार असल्याचे आश्वासन प्रभाग क्रमांक ३ मधील भारतीय जनता पार्टीच्या उमेदवारांनी मतदारांना दिले.
प्रभाग क्रमांक ३ मधील भाजपाचे अ गटातील उमेदवार डॉ श्रेयस प्रितम खांदवे, ब गटातील उमेदवार अनिल सातव, क गटातील उमेदवार ऐश्वर्या सुरेंद्र पठारे, ड गटातील उमेदवार रामदास दाभाडे यांनी लोहगाव मधील विविध भागांत आशीर्वाद यात्रा काढत नागरिकांशी थेट संवाद साधला. या यात्रेला नागरिकांचा उत्स्फूर्त प्रतिसाद लाभला. हरणतळे वस्ती, मुरकुटे वस्ती, झेडपी शाळेमागील परिसर, लेक व्ह्यू सोसायटी, छावा कॉलनी, जनार्दन नगर तसेच सैनिक कॉलनी क्रमांक १ व २ या भागांतून यात्रा पुढे जात समारोप करण्यात आली.
डॉ. श्रेयस प्रितम खांदवे म्हणाल्या, लोहगाव ग्रामपंचायत असताना माझे सासरे कै. प्रतापदादा खांदवे यांनी गावचा विकास केला होता. माझे पती प्रीतम खांदवे हे उपसरपंच असताना त्यांनी देखील गावात अनेक विकास कामे केली आहेत. लोहगावचा पुणे महानगरपालिकेत समावेश झाल्या नंतर प्रथमच महापालिका निवडणूक होत आहे. यामध्ये मला भाजपा कडून संधी मिळाली असून मी खांदवे- पाटील घराण्याचा विकासाचा, जनसेवेचा वारसा कायम ठेवत लोहगावचा नियोजनबद्ध विकास करणार आहे.
अनिल सातव म्हणाले, लोहगावचे आणि माझे अतूट नाते आहे. त्यामुळे वाघोली सोबत मी लोहगावचा अधिक विकास करण्यामध्ये आपला भर असणार आहे. यासाठी मतदारानी आम्हा चौघांनाही विजयी करावे.
ऐश्वर्या पठारे म्हणाल्या, माझे सासरे आमदार बापुसाहेब पठारे यांनी हरणतळे विकसित केले होते. त्यानंतर कोणी लक्ष दिले नाही. आपण निवडून आल्यावर हरण तळ्याचे सौंदर्यीकरण करणार आहे. ससून च्या धर्तीवर १०० खाटाचे रुग्णालय लवकर सेवेत सुरू होईल. आयटीआय कॉलेज या परिसरात सुरू होणार आहे. वन उद्यान करण्याचा आपला प्रयत्न आहे. त्यामुळे हरणतळे परिसर विकासाच्या उंचीवर पोहोचणार आहे आणि आम्ही त्यासाठी कटिबद्ध आहोत.
रामदास दाभाडे म्हणाले, पॅनेल प्रमुख म्हणून जबाबदारीने सांगतो की आम्ही चारही जण निवडून येणार आहे. त्यामुळे सर्व प्रथम आपण लोहगाव मधून विकास कामाला सुरुवात करणार आहोत. गावातील उमेदवार नाहीत हा केवळ विरोधक अपप्रचार करत आहेत, हे साफ खोटे आहे. आम्ही चौघांनीही लोहगावच्या विकासाचे पालकत्व घेतले आहे. प्रभागाचा विकास हा नियोजनबद्ध आणि दीर्घकालीन असावा, यासाठी कटिबद्ध असल्याचे आश्वासन उमेदवारांनी यावेळी दिले.
आशीर्वाद पद यात्रे दरम्यान उमेदवारांनी घराघरांत भेटी देत नागरिकांच्या समस्या, सूचना व अपेक्षा जाणून घेतल्या. नागरिकांशी संवाद साधत रस्ते, पाणीपुरवठा, स्वच्छता, आरोग्य, सुरक्षा, शिक्षण आणि इतर मूलभूत सुविधांबाबत नागरिकांनी मांडलेल्या मुद्द्यांची दखल घेतली.
फोटो: प्रभाग क्रमांक ३ (विमाननगर – लोहगाव – वाघोली) या प्रभागातील लोहगाव मधील हरणतळे परिसरात भाजपा उमेदवारांनी पदयात्रा काढत प्रचार केला.
By
