नंदी बैल घेऊन फिरणाऱ्याच्या मुलाने एशियन युथ कुस्ती स्पर्धेत पटकाविले सुवर्ण पदक

नंदी बैल घेऊन फिरणाऱ्याच्या मुलाने एशियन युथ कुस्ती स्पर्धेत पटकाविले सुवर्ण पदक कुटुंबाने लोहगावात झोपडीत व्यक्त केला आनंद

लोहगाव टाईम्स: प्रतिनिधी

वडील लोहगावातील झोपडीत राहून दारोदारी नंदी बैल घेऊन भविष्य सांगत तर आई, बहीण सुई दोरा विकून उदरनिर्वाह करणाऱ्या झोपडीतील १७ वर्षीय युवकाने बहरैन देशात येथे झालेल्या एशियन युथ कुस्ती स्पर्धेत सुवर्ण पदक मिळविले आहे. परिस्थिती वर मात करून लोहगाव ते बहरैन देशा पर्यंत कुस्ती खेळणाऱ्या १७ वर्षीय वयोगट व ६० किलो वजनी गटातील आंतरराष्ट्रीय युथ स्पर्धेतील सुवर्ण पदक विजेता सनी सुभाष फुलमाळी याचा प्रवास थक्क करणारा असा आहे.

पै. सनी फुलमाळी याचे मूळ गाव बीड जिल्ह्यातील आष्टी येथील आहे. हे कुटुंबीय मागील पंधरा वर्षांपासून लोहगाव मध्ये रहायला आहेत. फुलमाळी परिवाराचा मूळचा परंपरागत व्यवसाय हा नंदीबैल घेऊन दारोदारी फिरून त्यावर उपजीविका करणे हा आहे. वडील सुभाष माळी आजही नंदीबैल घेऊन गावोगावी जातात. तर सनी ची आई, बहीण सुई दोरा विकते. मोठा भाऊ शिक्षण घेत आहे. याच कुटुंबात वाढलेल्या सनी हा कुस्ती खेळात तरबेज होता. ही चुणूक ओळखून लोहगाव मधील रायबा तालीम मध्ये पै. सोमनाथ मोझे, पै. सदा राखपसरे यांनी सनी ला कुस्ती चे धडे देण्यास सुरवात केली. त्याचे कुस्ती तील डावपेच ओळखून त्याला खेळण्यासाठी लोणीकंद येथील जाणता राजा तालमीत संदीप भोंडवे यांच्या तालमीत पाठविला. सनी ची परिस्थिती पाहून संदीप भोंडवे यांनी त्याचा पूर्ण खर्च उचलण्याची तयारी दर्शवली. आणि ती ते पार देखील पाडत आहेत.
सनी ने नुकत्याच बहरैन देशात झालेल्या एशियन युथ कुस्ती स्पर्धेत सनी याने सुवर्ण पदक पटकावून लोहगाव सह देशाचे नाव आशियाई देशात केले आहे. याबाबत सनी फुलमाळी म्हणाला, घरची परिस्थिती हलाखीची होती. आपल्याला वस्ताद संदीप भोंडवे यांनी दत्तक घेतले. आणि खर्च केला. बाहेरून शिक्षण चालू असून सध्या दहावी मध्ये शिकत आहे. महाराष्ट्र चॅम्पियन स्पर्धा जिंकल्यानंतर मी नॅशनल स्पर्धेत पराभूत झाल्यावर मला सिल्वर मेडल मिळाले होते. यानंतर एशियन युथ गेम मध्ये आपली निवड झाली. मी इराक, इरान, जपान, कोरिया आदी देशातील खेळाडू सोबत सहा वेळा कुस्ती केल्या नंतर मला गोल्ड मेडल मिळाले आहे. आता आपले स्वप्न ऑलम्पिक स्पर्धा जिंकण्याचे आहे. वडील सुभाष फुलमाळी म्हणाले, सनी किंवा त्याच्या भावाने आंतरराष्ट्रीय कुस्ती स्पर्धेत चमकावे अशी इच्छा होती. ती इच्छा सनी ने पूर्ण केल्याने आपल्यासह कुटुंबाला खूप आनंद झाला आहे. रायबा तालमीचे पै. सोमनाथ मोझे म्हणाले, सनी तालमीत सराव करताना खूप चलाखी दाखवत होता. त्याचा खेळ चांगला होता. पण परिस्थिती आडवी येत होती. त्यामुळे संदीप भोंडवे यांच्याकडे त्यास दत्तक देऊन पुढील जबाबदारी त्यांच्यावर सोपविली होती. त्यामध्ये सनी यशस्वी झाल्याने रायबा तालमीचे नाव सर्वत्र पोहोचले.

आमदार पठारे यांच्याकडून ११ हजार रुपये बक्षीस
सनी फुलमाळी याचा आमदार बापुसाहेब पठारे, युवा नेते सुरेंद्र पठारे, रविंद्र पठारे, प्रितम खांदवे, निलेश पवार, सोमनाथ मोझे यांनी त्याचा सत्कार केला. आमदार पठारे यांनी ११ हजार रुपयांचे बक्षीस सनी याला चेक द्वारे दिले. वेळवेळी मदत करण्याचे आश्वासनही दिले