लोहगाव, वाघोली, विमाननगर परिसरात कचऱ्याचे ढीग
लोहगाव टाईम्स: प्रतिनिधी
लोहगाव, विमाननगर, वाघोली, खराडी आणि वडगावशेरी परिसरात गेल्या अनेक दिवसांपासून कचऱ्याचे प्रचंड ढीग साचलेले आहेत, ज्यामुळे नागरिकांना अस्वच्छतेचा आणि आरोग्याचा सामना करावा लागत आहे. नगर रोड क्षेत्रीय कार्यालयाच्या आरोग्य विभागातील सावळा गोंधळ कारणीभूत असून घनकचरा व्यवस्थापन विभागाने पूर्णतः दुर्लक्ष केले असून, परिसरातील परिस्थिती दिवसेंदिवस बिकट होत चालली आहे.
नागरिकांच्या करातून चालणाऱ्या प्रशासनाकडून अशा प्रकारची निष्काळजी वृत्ती अत्यंत निषेधार्ह आणि गैरजबाबदार आहे. या संदर्भात पुणे महानगरपालिकेचे आयुक्त नवल किशोर यांना काँग्रेस चे कार्यकर्ते करीम शेख यांनी निवेदन दिले आहे. परिसरातील साचलेला कचरा तात्काळ हटवून, संबंधित आरोग्य अधिकारी व जबाबदार अधिकाऱ्यांकडून खुलासा घेऊन कठोर कारवाई करावी, अशी मागणी करण्यात आली आहे. लोहगाव मध्ये तर जमा केलेला कचरा पाच पाच दिवस झाले उचलला जात नाही. मुकादम त्यांचे नेमून दिलेले काम करत नाही. स्वच्छ कर्मचाऱ्यांचा कचरा वेळेवर घेतला जात नाही त्यांना गाड्या उपलब्ध करून दिल्या जात नाहीत. या गंभीर समस्येकडेवर घनकचरा विभागाच्या उपायुक्तांनी तातडीने लक्ष घालून कचऱ्याचा गंभीर प्रश्न सोडवावा अशी मागणी होत आहे.
याबाबत वरिष्ठ आरोग्य निरीक्षक धनश्री जगदाळे म्हणाल्या, कचरा घेऊन जाणाऱ्या गाड्या नादुरुस्त झाल्याने कचरा उचलला गेला नाही मात्र आता गाड्यांचे नियोजन केले आहे. लोहगाव मोठे असल्याने दोन आरोग्य कोटी करून कामकाजाचे नियोजन केले जाणार आहे.
फोटो: लोहगाव वाघोली रस्त्यावर एचपी पेट्रोल पंपावर साचून राहिलेला कचरा.
By
