खून करून हल्लेखोर पसार ; वाघोली पोलीस ठाण्यात गुन्हा दाखल
वाघोली : पुणे-नगर महामार्गालगत वाघोलीतील उबाळे नगर परिसरात असणाऱ्या प्यासा बार समोर वादिवाद झाल्यानंतर पोलिसांच्या रेकॉर्डवरील एका तरुणाचा निर्घृण खून रविवारी (दि.५) मध्यरात्री साडे तीनच्या सुमारास करण्यात आला. त्याच्याच तीन साथीदारांनी धारधार शस्त्राने वार करून तसेच डोक्यात दगड घालून खून केल्याने वाघोली पोलीस ठाण्यात गुन्हा दाखल करण्यात आला आहे. खून करून फरार झालेल्या मारेकऱ्यांचा शोध पोलीस घेत आहेत.
बादल अन्वर शेख (वय २४, रा. आपलेघर सोसायटी, खराडी) असे खून झालेल्या तरुणाचे नाव असून पोलिसांनी अक्षय पटेल (रा. आपलेघर) , मयूर वडमारे (रा. खुळेवाडी), प्रदीप जाधव (रा. आपलेघर) यांच्यावर गुन्हा दाखल केला आहे. याप्रकरणी राम अशोक गजमल (रा. खांदवेनगर) यांनी फिर्याद दिली आहे.
याबाबत मिळालेल्या माहितीनुसार, रात्री उशिरा खराडी परिसरात बादल शेख आणि त्याचे तीन साथीदार यांच्यात किरकोळ कारणावरून वाद झाला होता. त्यानंतर हे चौघेही वाघोलीतील उबाळे नगर परिसरात आले. कृष्णा लॉज येथे रूम घेण्याबाबत चौकशी करत असताना पुन्हा त्यांच्यात वाद वाढला. याच दरम्यान बादल शेखवर हल्ला केला. हल्लेखोरांनी त्याच्यावर वार करून त्यानंतर डोक्यात मोठा दगड घालून त्याची हत्या केली. घटनेनंतर हल्लेखोर घटनास्थळावरून फरार झाले. या हल्ल्यात बादल शेखचा जागीच मृत्यू झाला होता. पोलिसांनी तातडीने घटनास्थळी धाव घेऊन पंचनामा करून मृतदेह शवविच्छेदनासाठी पाठवला आहे. याबाबत वाघोली पोलिस ठाण्यात खुनाचा गुन्हा दाखल करण्यात आला असून, पोलिसांनी हल्लेखोरांचा शोध सुरू केला आहे. खुनामागील नेमके कारण समजण्यासाठी तपास सुरू आहे.
By
